المؤلف حاتم حافظ يقدم “دليل المتفرج الذكي” لمسلسلات رمضان: “مفيش نمبر وان”
كتبت: إسراء البواردي
نشر المؤلف حاتم حافظ، دليلاً لمتابعي مسلسلات دراما رمضان هذا العام من 10 نقاط، وتفاعل معه عدد من المتابعين وبعض نجوم الفن.
وكتب “حافظ” في منشور عبر صفحته على موقع التواصل الاجتماعي فيسبوك عنوانه بـ”دليل المتفرج الذكي لدراما رمضان”، إنه لا يجب على المشاهد متابعة لون فني لا يعجبه من الأساس بهدف النقد أو توجيه السباب طوال الوقت.
وقال إن هناك 10 نقاط يجب أن يراعيها المشاهد – من وجهة نظره -، وهي: “أولاً: فيه أكتر من ٥٠ مسلسل، اختار المسلسلات اللي على ذوقك بس واتفرج عليها”.
وأضاف: “ثانياً: مافيش سبب يخليك تتفرج على نوع فني انت مش بتحبه وتقعد تشتم فيه، ما تبقاش زي اللي راح على راس القرد وشمها، ثالثاً: كلنا بنحب نجوم عن نجوم وما بنحبش نجوم تانيين.. اتفرج بس على نجومك وسيب اللي مش بتحبهم في حالهم”.
واستكمل: “رابعاً: لما تلاقي حد مبسوط بمسلسل مش لازم تدخل تعلق عنده وتكرهه في عيشته، خلونا ننبسط كلنا، خامساً: فيه مسلسلات فيها عنف، معلش هي تصنيفها أكشن، لو ما لكش في الأكشن محدش هيمتحنك فيه”.
وتابع: “سادساً: مش ضروري تقول رأيك في الخمسين مسلسل، محدش أصلا عنده وقت ولا طاقة لمتابعة العدد دا، سابعاً: قول رأيك بكل وضوح، بكل حرية، بس أرجوك واحنا في شهر فضيل مش لازم تشتم في عمل ولا تهين حد، خلي الملافظ سعد”.
وأردف: “ثامناً: مافيش نمبر وان، ولا الأكثر مشاهدة، كل الأنواع الفنية ليها جمهورها، ويارب يبقى عندنا خمسين عمل ناجح، تاسعاً: انبسط وسيب الناس تنبسط وخلينا نعدي الشهر برواق”.
واختتم المؤلف حاتم حافظ إرشاداته وقال: “لو انت شايف إن الفن حرام أو إن فلوس المسلسلات دي كانت يتعمل بيها مش عارف إيه فإنت الله يعينك والكلام دا كله مش ليك”.
ولدى حاتم حافظ بصمة بارزة حيث قام بتأليف العديد من المسلسلات أبرزها “الشارع اللي ورانا” و”استيفا” و”سيدنا السيد” و”جبل”، وآخرها مسلسل “صفحة بيضا” بطولة الفنانة حنان مطاوع.
