داليا أشرف
أعلنت الإعلامية “ريهام سعيد” عن اعتزالها تقديم البرامج مرة أخرى واتجاهها نحو تحقيق حلمها.
ونشرت سعيد عبر حسابها الخاص على”إنستجرام” صورة لها وكتبت معلقة: “فكرت كتير قبل ما أكتب البوست ده أنا اعتزلت التمثيل سنة 2015 لأني حسيت إن صاحب بالين كداب وإن التمثيل مأثر على مسيرة الخير اللي ابتديتها من سنين طويلة عشان الوقت والمجهود اللي بعمله لكن عشقي للتمثيل اللي هو دراستي ومهنتي الأولى قبل الإعلام رجعت أمثل تاني وأنا لسه في نظر المخرجين والمنتجين مذيعة عايزة تمثل”.
وتابعت قائله: “كنت عارفة إني عشان أخد مكاني كممثلة لازم أسيب الإعلام زي مع حفظ الألقاب “داليا البحيري” و “بسمة” و “دينا فؤاد” و “دينا الشربيني” وغيرهم بس مكنتش قادرة أسيب رسالتي اللي كانت مهمة أوي وقتها، أنا حصل لي مشاكل كتير من المهنة دي بتأثير باطل من السوشيال ميديا من منافسين وأعداء بسبب المشاهده العالية جداً والنجاح أنا تعبت وحاسة إني قدمت كل اللي ممكن يتقدم والدولة عاملة اللي عليها، ومش محتاجين دور المجتمع المدني في مساعدة الناس ولكن أنا لي الشرف إني اشتغلت في المهنة العظيمة دي اللي ليها رسالة سامية وعظيمة، وليا الشرف إني كنت إعلامية في أصعب وقت مر على الإعلاميين أيام حكم الإخوان والحمد لله كان لينا موقف واضح وما اتغيرش ولا دقيقة”.
واستكملت موضحة: “أنا الحمد لله حققت كتير في التمثيل وكل اللي اشتغلته علِّم مع الناس واشتغلت أعمال كلها قيمة بس بعد ما جالي السكر وشوية مشاكل تانيه قررت أعمل اللي بحبه، أنا بكل أسف بعلن اعتزالي الإعلام تماماً وهركز كممثلة وهطلب من الدكتور “أشرف زكي” إنه يساعدني إني أغير الفكرة الموجودة في أذهان المخرجين والمنتجين إني مذيعة”.
ووجهت رسالة للأستاذة والمخرجة “كاملة أبو ذكري” قائله: “رسالة للأستاذة كاملة أبو ذكري ومش مكسوفة نفسي أوي أمثل معاكي حتى لو مشهد ده من أحلامي خطوة صعبة وفيها ريسك كبير بس على الأقل أجري ورا حلمي حتى وأنا في السن ده جه الوقت إني أستمتع باللي بعمله وبحبه وخصوصاً لما يكون في عصر ولا فيه واسطة ولا محسوبية اللي هيجتهد هيوصل”.
واختتمت كلامها بتوجيه الشكر لجمهورها وقالت: “ماتسيبوش حلمكم مهما فات الوقت بشكر جمهوري من الأمهات والشباب والأطفال اللي دائما بيدعموني وحبوا برامجي وأتعلموا منها، وبشكر ربنا على عشرين “20” سنة أداني الفرصة فيها إني أقضي حوائج الناس وأقدم كل ما هو مفيد، فخورة بكل حلقة، وبكل حرف قدمته .. 20 سنة تعب وسهر وتصميم على تقديم الحقيقة، أنا آسفة ليكوا، بس التمثيل رسالة برضو، وهو حلمي الأساسي اللي اتأخرت أوي عشان أحققه .. يا رب وفقني وساعدني”.
يذكر أن قرار إعتزال الإعلامية “ريهام سعيد” ليس أول مرة، بل حدث في نهاية 2019 بسبب حلقة أزمة السمنة وعلقت: “هتفرغ لربنا وبيتي”.
