هنا زهران : زعلت لما المسلسل خلص ونفسي أكون فاتن حمامة المستقبل

حوار : أحمد حنورة

فنانة موهوبة صغيرة في السن كبيرة في المقام ، تبلغ من العمر ١٠ أعوام فقط ، بدأت التمثيل وهي في الرابعة من عمرها ، تعشق التمثيل والغناء والرسم والبالية والجمباز ، تدرس في الصف الخامس ، قال عنها أكرم حسني :- فاتن حمامة المستقبل ، إنها الموهوبة هنا زهران وإليكم نص الحوار :-

من الذي رشحك لهذا الدور ؟

الأستاذ اكرم واستاذ خالد الحلفاوي .

كيف تم اختيارك للدور ؟

تم اختياري للدور بعد شغلي مع استاذ اكرم من قبل في رمضان في مسلسل رجاله البيت .

ما هو احساسك وانتي بتمثلي مع نجوم كبار ؟

مبسوطه جدا وأنا بمثل معاهم وكنت بشعر بإننا أسره واحدة ، وزعلت لما المسلسل خلص .

هل كنتي مخضوضه لانك صغيرة سنا ؟

لا .

كيف استعديتي للدور ؟

استعديت بإني قريت أنا ووالدتي الورق وعرفت شخصيه جليله والكاركتر العام بتاعها .

وأضافت هنا :- استاذ اكرم وهنادي وكل فريق العمل كانو لطاف اوي معايا وكانو دائما بيهزروا وكانوا بيحترموني رغم صغر سني ودائما كانو بيقولوا إني بعمل جو في المكان أيام تصويري عشان انا الطفله الوحيده اللي كنت موجودة .

وأسردت قليلا :- انا كنت ببقي مستنيه أيام تصويري عشان كانوا بيوحشوني جدا وبتبسط معاهم اوي .

ما هي أبرز أعمالك السابقة ؟

الرحلة ، طلقة حظ ، لآخر نفس ، أجازة مفتوحة ، شبر ماية ، بخط الأيد ، حشمت في البيت الأبيض ، رجالة البيت ، بعض الحواديت في إلا أنا و زي القمر ، أما عن الأفلام :- ليلة هنا وسرور ، ويوم مصري وصاحب المقام .

ما هي أعمالك القادمة ؟

الغرفة ٢٠٧ ودا رعب مع الأستاذة ريهام عبدالغفور ، البيت بيتنا حاجة رعب وكوميدية مع استاذ خالد الحلفاوي وكريم محمود عبد العزيز ومصطفى خاطر وغيرهم من الفنانين وورقه توت مع استاذ حسام علي ومجموعه كبيره من الممثلين ، وبنصور فيلم وانا البطلة بتاعته اسمه البوابة مع مخرج سوري فرنساوي اسمه استاذ شادي أبو العيون السود ومرشح لمهرجان كان .

من هم ممثلينك المفضليين ؟

انا بحب ممثلين كتير بعضهم اشتغلت معاه زي ريهام عبد الغفور وحنان مطاوع واستاذه حنان سليمان وأيتن عامر وبحب اوي استاذ أكرم حسني اللي دائما بيقول عليا فاتن حمامة المستقبل والبعض التاني اللي بتمنى اتعامل معاه زي دنيا سمير غانم وتامر حسني وأمير كراره وأحمد عز وأحمد السقا .

كيف تم اكتشاف موهبتك في السن الصغير ؟ ومن الذي اكتشفك ؟

من الأدوار اللي بعملها ، واللي اكتشف موهبتي استاذ حسام علي واستاذه مها سليم في الرحله وانا بحبهم اوي .

وأكملت هنا :- شاركت في فيلم مع مخرج سوري أمريكي اسمه مارك لاتي وحصل علي جائزة بمهرجان أسوان .

واستكملت عن مسلسل مكتوب عليا قائلة :- كلهم كانو بيحبوني وبيشجعوني جدا واستاذ خالد كان دائما يقولي طب انتي ممثله شاطره وطلعتي بتعرفي تغني وبترسمي وبتلعبي سكيت بورد مبتعرفيش تعملي ايه ؟

ما هي أهدافك التي تسعي لتحققيها في المستقبل ؟

إني أكون ممثله متميزة وأفضل شاطره في المدرسه والباليه والجمباز ، ونفسي اكون زي ما استاذ اكرم بيقول فاتن حمامه المستقبل .

وأشارت هنا قائلة :- كنت سعيدة أوي في مسلسل مكتوب عليا لأن الأستاذ أكرم كتبلي كوبلية في تتر المسلسل .

وأختتمت هنا حديثها :- اشتركت في المسرحية التي عرضت أمام فخامة الرئيس عبدالفتاح السيسي في أول أيام العيد مع هنادي مهنا وأستاذ اسماعيل فرغلي والاستاذ أشرف عبدالباقي وكريم محمود عبدالعزيز وشيري عادل ، وأستاذ أكرم كان معزوم ومجموعة كبيرة من فنانين مسلسل الإختيار ولأول مرة أعمل مسرح مع استاذ أشرف عبدالباقي .