محمد حراز يكتب .. الأشاير والبشاير الفصل العاشر

وصل خبر مقتل الباشكاتب مظهر إلى نرجس، فانهارت وبكت عليه بكاء الحبيب لفقدان حبيبه، حتى ذَبُلت كما تَذبُل أوراق الورد فوق أغصانها..

لاحظت الأم تدهور حال ابنتها، ولاحظت أنها أصبحت شبه ممتنعة عن الطعام، فسألتها: إيه اللي جرالك يابنتي؟!

نرجس: مفيش يامه…

أم نرجس: مفيش ازاي .. هو انا مش عرفاكي ..

نرجس والألم يعتصرها، والحزن يسيطر عليها قالت بصوت يكاد لا تسمعه الأم: مفيش يامه….

أم نرجس: مالك ياقلب أمك .. فيكي إيه ياضنايا؟!

نرجس: قتلوا الراجل الغلبان يامه، ونعناع وعزوز دايرين في البلد يقولوا المزيَّرة خنقته..

أم نرجس: هما مين يابنتي اللي قتلوه؟

نرجس: اللي قتلوا الشيخ سعدالله وحريمس وبهانه ومتولي، اللي مبيخافوش ربنا

أم نرجس: مظهر عاش فى حالهُ، مالوش خُلطة بحد، والمزيَّرة شافوها بتطلع عند الحنفية ..

نرجس: انتي مصدقه يامه الحواديت بتاعة المزيَّرة دي .. مين دول يامه اللي شافوها؟!

أم نرجس: حواديت؟! .. لا يابنتي مش حواديت، ستك الله يرحمها شافتها بدل المرة أكتر من مرة ….

نرجس،: يامه مفيش حاجه اسمها مزيَّرة، دول كانوا بيخوفوكم علشان متطلعوش من البيت بالليل..

أم نرجس: طيب يابنتي .. قومي اغسلي وشك، وغيري هدومك وادعيلهُ بالرحمة

نرجس: حاضر يامه….

ليمان طره

السجان: صديق العشماوي محليس

صديق: أفندم

السجان: زيارة

صديق: زيارة .. ؟!

السجان: خلص نفسك .. انتفض كده .. فز جوم

صديق يحدث نفسه بسخرية: مين اللي ها يجيلك يا صديق، ويسأل عنك غير الريس حمدون..

السجان: ياللا بلاش كُتر غَلَبهَ .. فِز جوم .. زيارة خاصة

صديق: خاصة .. مفيش غير أبو الواجب الريس حمدون….

صُعق صِديق عندما رأى زوجته سعدية تحمل طفلها الرضيع فقال: سعدية؟! .. إيه اللي جابك ياسعدية .. و وصلتي هنا ازاي؟!

سعدية: اللي يسأل مايتوهش ياخويا .. طمني عليك وعلى أحوالك، بتاكل .. بتشرب .. بتنام؟!

صِديق: أنا كويس .. طمنيني عليكي انتي وعلى العيال .. حمدون عامل معاكم إيه؟!

قصت سعدية كل ماحدث لها ولأولادها بعد دخوله السجن، وكيف تعامل معها حمدون، وكيف قطع المبلغ الذي كان يساعدها به، مما اضطرها للخروج للعمل في الحقول لتتمكن من توفير الطعام لها ولأطفالها، ……….، ……….

صديق: كده .. طيب ياحمدون

الصاغة

نتيجة حائط معلقة خلف حليم تُظهر تاريخ اليوم الثلاثاء الموافق ١٩٥١/١٢/٤

حمدون: مساء الخير ياحليم بيه، الواد فتحي فات عليا وقال انك عايزني ضروري..

حليم: مساء الخير، اقعد ياحمدون .. قهوتك مظبوط

حمدون: مظبوط ياحليم بيه..

حليم: فتحي

فتحي: حالا..

حليم: متجيش غير بيها..

فتحي: حاضر.

بعد انصراف فتحي..

حليم: العملية اتأجلت…..

حمدون: اتأجلت؟! .. خير .. إيه اللي حصل؟!

حليم: زيارة النحاس باشا لرئيس الحكومة اللبنانية عبدالله اليافي، جات على دماغنا

حمدون: على دماغنا ازاي؟!

حليم: تم تشديد المراقبة على السواحل اللبنانية بسبب انزعاج مصر من عمليات التهريب الأخيرة..

حمدون: احنا قلنا خلاص .. كلها كام يوم ونرتاح بقى، يجي النحاس باشا على حظنا ويعمل كده..

حليم: متقلقش الرجالة هناك مستعجلين أكتر مننا .. المهم الرجالة اللي هاتشيل؟!

حمدون: جاهزين

حليم: وفلوسهم؟!

حمدون: كاش ….

حليم: براڤو عليك .. هأكد على الجماعة في بيروت ينجزوا الشحنة بأسرع وقت، وانت خليك جاهز..

حمدون: حمدون جاهز في أي وقت ياحليم بيه .. بالإذن.

حليم: والقهوة؟!

حمدون وهو يضحك: شِربتها خلاص

حليم: مقلتليش .. الفرح امتى؟!

حمدون: بعد العملية..

حليم: وشبكتك ومصاريف فرحك عندي ياحبيبي.

فتحي: القهوة ياريس حمدون

حمدون: معلش يافتحي .. المراكب داخلة ولازم أكون موجود مع الرجالة .. بالإذن ياحليم بيه

حليم: متنساش تبقى تجيب العروسه تختار شبكتها بنفسها

الحارة

بسارية يقوم بتنظيف الحلقة وإذا بنرجس تنادي عليه

_ بساريه .. بساريه

بساريه: أيوة ياست نرجس ..

نرجس: تعالى عيزاك

بساريه: الريس حمدون مش موجود

نرجس: أنا مش جايه لحمدون .. أنا جيالك انت..

بساريه: جيالي؟!

نرجس: أيوة جيالك..

يبتسم بساريه ويهندم ملابسه، ويعدل طاقيته على شعره المدلي ثم يقول: أؤمريني ياست نرجس

نرجس: متقولش بس ياست نرجس، قولي يانرجس

بساريه: أنا صاحي ولا نايم يا جدعان

نرجس: لأ صاحي .. انت اللي مش واخد بالك من نفسك..

وهنا يأتي حمدون: يا أرض احفظي ماعليكي .. الحلقة منورة .. حلقة ايه الحارة كلها منورة ياست البنات، خير طمنيني .. في إيه كف الله الشر .. أوعي الست الوالدة تكون بعافية؟!

نرجس: لا ياريس .. أنا بس …… ( تنظر إلى بساريه) .. كنت عايزة أشوفك

حمدون: يا سنه بيضه ياحمدون، اجري يابساريه هات (أزوزة) لست البنات

نرجس: مالوش لزوم ياريس .. أنا بس عايزة عثمان المشعلجي يزوَّد زيت الفانوس اللي عند البيت، علشان يكمل لحد النهار مايطلع..

حمدون: عثمان بس .. الكوبانية كلها .. أمر ياست البنات .. الفوانيس كلها .. فوانيس إيه؟!.. الشارع كله ينور علشان خاطر عُيونِك.

نرجس: متحرمش ياحمدون .. هاروَّح بقى لاَمَي تستعوقني

حمدون: بساريه.

بساريه: نعمين يامعلمي

حمدون: مع ست البنات لحد باب البيت

بساريه: عينيا يامعلمي..

حمدون: مع السلامه ياست البنات

بساريه يسير بجانب نرجس يؤخر قدم ويقدم الأخرى فطلبت منه أن يسير بجانبها: مِد يابساريه امشي جنبي

بساريه: أنا……..

نرجس: أيوة انت يابني آدم

بساريه: حلم ولا علم اللي بسمعه ده ياولاد

نرجس: علم يا بساريه علم، وقبل أن تدخل منزلها قالت له بدلع: مع السلامه يابساريه

بساريه يعدل من نفسه، ويهندم ملابسه: مع السلامه ………..

مركز البوليس

المأمور: المعلومات اللي وصلتلنا من مكتب المكافحة بتأجيل العملية كانت مفاجأة كبيرة يارشدي..

اليوزباشي رشدي: نتيجة مباشرة بعد اجتماع النحاس باشا برئيس الحكومة اللبنانية .. لكن اعتقد يافندم انهم ها يحاولوا يستأنفوا شغلهم رغم تشديد المراقبة عليهم..

المأمور: وده نفس اللي قالهُ البكباشي الصيرفي، يبقى واجبنا اننا نفتح عنينا كويس، ولازم حمدون يتحط تحت المراقبة طول الوقت

اليوزباشي رشدي: اطمن يافندم دا اللي حاصل بالفعل..

الحارة

عثمان المشعلجي: صباح الخير ياريس حمدونه.

حمدون: صباح الخير ياعثمان

عثمان: خير ياريس حمدونه .. بوساريه بلغني إنك عايزني

حمدون: اقعد ياعثمان

عثمان: تعيش ياريس حمدونه

حمدون: فطرت ياعثمان ولا لسه

عثمان: الحمدالله (فوطرت) ياريس حمدونه

حمدون: طيب ياعثمان عايز منك خدمة

عثمان: خدمة مني أنا

حمدون: عايزك تتوصى بالفانوس اللي على بيت أم نرجس تزود الزيت بتاعهُ شوية.

عثمان: وفانوس الحنفية اتوصى بيه كمان ياريس حمدونه؟!

حمدون: الحنفية؟!

عثمان: علشان (الموزيَّرة) اللي خنقت مظهر أفندي….

حمدون: المزيَّرة……..